Suodjalanvuloš Bulju meahcceguovllu Natura 2000 -guvlui gullet Bulju meahcceguovlu ja Raakevuoma-Vuossijänkä jekkiidsuodjalanguovlu. Guovllu ollesviidodat lea 56 351 hektára.
Plánenguovllus 70 % gullá Gihttela gildii ja 30 % Eanodaga gildii. Eanodat gullá sámiid ruovttuguvlui.
Guovllus dollet bohccuideaset Neakkela, Kyrö ja Goikečoalmmi bálgosat.
Plána čohkkema doarjjan bovdejuvvojedje čanasjoavkkuid ovddasteaddjit ovttasbargojovkui. Dán plánas heivehuvvojedje Akwé: Kon -prinsihpat nu, ahte sámediggi nammadii čanasjovkui golbma ovddasteaddji, iige dušše ovtta dego dábálaččat.
Bulju meahcceguovllus leat viiddis jeakkit sihke várit ja duoddarat. Duoddarat leat viehka vuollegaččat ja duolbadat. Alimus duottarčohkka lea Buljuduottar (471,5 m mdb) guovllu lulágeahčen. Guovlu lea mearkkašahtti boreála duottarluonddu (duottarguolbanat, lagešvuovddit) ja nuppe dáfus Giehtaruohttasa guvlui davimus luondduvuvddiid ja áhpejekkiid suodjalanguovlu.
Plánenguovllu árvvuide gullet suodjalanárvvut (luondotiippat, šaddo- ja eallišlájat), meahccáivuohta, sámekultuvra, boazodoallu ja lustageavaheapmi. Guovllu árvvuide ii leat čuohcimin dakkár geavaheapmi, masa dáinna plánain sáhttá váikkuhit.
Oppa plánenguovlu gullá boaittobealeavádahkii – dahjege guvlui eai stivrejuvvo aktiivvalaččat galledeaddjit eaige ráhkaduvvo ođđa bálvalanrusttegat. Plánenguovllus eai leat olus vánddardanráhkadusat (ávdinstobut, gámme, lávvu). Dat dollojuvvojit oruhahttin. Gahperašbuolláma gámppás livččii jurdda luohpat.
Lisätietoja:Almmustahttin ii leat oažžumis, go stuorámus oassi sisdoalus boahtá diehtovuogádagas, mas dieđut eai dál leat fáhtehahtti hámis. Deaŧalaš áššit leat muitaluvvon almmustahttima álggus lean čoahkkáigeasus, mii lea fáhtehahtti.
