Sápmelaččaid ruovttuguovllu luondduriggodatplána 2022–2027

Luondduriggodatplána stivre Meahciráđđehusa doaimma sámiid ruovttuguovllus jagiid 2022-2027.

Luondduriggodatplánen lea stáhta oamastan eana- ja čáhceguovlluid guhkes áigegaskka suvdilis ávkkástallama plánen. Dán luondduriggodatplána guovddáš earru Meahciráđđehusa eará luondduriggodatplánaide lea, ahte dás luondduváriid dikšun, ávkkástallan ja suodjaleapmi heivehuvvo oktii oamasteaddji ásahan mihttomeriide ja báikkálaš mihttomeriide nu, ahte seammás dorvvastat sámekultuvrra hárjeheami eavttuid. Sámiid ruovttuguovllu luondduriggodatplána gárvvistuvvui lávga ovttasbarggus Meahciráđđehusa áššehasain, guimmiin ja čanusjoavkkuin čohkkejuvvon ovttasbargojoavkkuin, sámedikkiin ja nuortalaččaid siidačoahkkimiin. Plánemii oassálaste maiddái boazodoalu, vuovdedoalu, turismma, gielddaid, bivddu, luonddusuodjaleami ja kulturárbbi sierra bargojoavkkut. Buohkaide rabas neahttajearahallama bokte buohkain riikkavuložiin lei vejolašvuohta beassat váikkuhit plánemii.

Luondduriggodatplánemii oassálaste maiddái nuorat: plánaguovllus ássán gávccátluohkkálaččat oassálaste bargobádjái, man lassin sámenuoraide ordnejuvvui gullandilálašvuohta ovttasbarggus sámedikki nuoraidráđiin.

Luondduriggodatplána ollašuvvama čuovvut jahkásaččat. Ođđa luondduriggodatplána gárvvistuvvo jagi 2027.